Luke 11

ÁánútumpaꞋo námúnaamo kwésen-kwasai.

Mátíyu 6:9-15, Mátíyu 7:7-11

1Ísu moórá-tawai Áánútuwe aaí kwésuwasa kwená kwayó-kwáásí máyówana Ísu simásuwowana kwená kwaásivinkemba moóráwai séna Ísóigoo Yóni nombá pétinkaiwai kwená kwayó-kwáásí agaráátínkáísasa Áánútuwe aaí kwésentemba kentáá agaráásínkénata Áánútuwe aaí senó súwana 2Ísu séna Áánútuwe aaí sénááomba maará séꞋa seró.

• kentáásivoo enáwíꞋa usáyaaitarain-awita
• kesáá mósá kwémaraumne. kentááráꞋá kawáá-uwoya
• kwésune.

3aasiyaasi-táwai kentáásí toóntá simiyó. 4 kwaásimo sáwíꞋo kwéumasinkewata mindáyaveta anondá íma sáwíꞋa umátinketa ivátá kwétuwaunaya miráumaiya kentáásí sáwí-imayaa maisiyuwaaó. sáwíꞋa ígwáe sésamo kentáámó íyamo e súwaꞋnaa íníyone. mirá-áímbá Áánútuwe seró Ísu siráiye. 5simásuwena simátimena séna moórá ená kwaási némpakemba noꞋwáán-avuntamba tína íma toómbá maké ená kwaásigona ontavaꞋá komé áísaa-e se kesí kwaási némpakemba timbá íma toómbá makáunana kánoꞋa máyáivo toómbá símínaꞋa mááméno sinaná 7kwená naaúmpakemba séna ontá umásuweta kesí aarai iyámpóíse suúyá kwaiguráumpo íma usásineꞋa aménaumpo kóaao síníye. 8kesí kwaási póꞋa aménaumne-imayaamo ímo kwéinanamo éna ayáátáákaꞋa inaaí kwésinana íma aigaemá ínana inaaí kwésindayavena usásinena amíníye. 9miráráán-umai simátimeꞋa séꞋa ÁánútunopaꞋo námúnaamo kwésemba áísaa úmae kwéiyiyana timíníye. ááyamae kwéiyiyana kentáái isáníye. kwéavakaa úmae iyíyana Áánútu agaráátinkaniye. 10áísaa íyanamo éna Áánútu timíníye. kwéaayewanamo éna Áánútu kentáái isáníye. avakáá íyanamo éna Áánútu agaráátinkaniye. 11keinárawaꞋa iyámpóígwara-kwaasi kentáánimbaaꞋo noyááꞋa simiyómó síyaꞋo éꞋa íma iraankavayaambá timénááowe. 12kokóri-auma simiyómó síyaꞋo éꞋa íma áwááisaan-uvowamba timénááowe. 13ánivo sáwí-kwaasi ombánivo kentáánimbaaꞋa kawe-tántááꞋá kwétimevo kwíyómpakemba kentáásivowa kaweré suꞋmai iwáí póna enamambá simiyó síyawai Áánútu kwenamambá timíníye Ísu siráiye.

Ísunte Píyésepuntei kwaasái.

Mátíyu 12:22-30, Mááka 3:20-27

14moóráwai arumpimbá taraváá-kwámbá máyowana íma aaí kwésuwana Ísu mayauwówana kóúwana minkwáásígó aaí súwasa sáwívarawai awánésa táátavai uwasá 15évakarawai sésa taraváá-kwántóntí kawáánáꞋá áwíꞋa Píyésepu asirayámbá amísana tokéna póna taraváá-kwámbá kwémaitiyuwaiye suwasá 16évakarawai Ísumo sáwí-aimbo sínda isánáe sésa áraira Áánútumpakena kunkáana ímo awánáúnda-mayai máyénata awánaano suwaná 17Ísu miwí tááma iséna simátimena séna moórá-andama ááiꞋa tiyésa pósa taaínkaar-umai mésa íma asiramáívakaamba kwémaewe. moórá-akumba usíyán-ákúmbá pósa taaínkaar-umai íma asiramáívakaamba kwémaewe. 18Sáátáánigo kwaásimo ááiꞋo tiyésamo taaínkaaꞋo ésamo ésa íma asiramáívakaamba kwémaewe. kentávéꞋo sembá Píyésepu asirayámbá ámísana tokéna póna taraváá-kwámbá kwémaitiyuwaiye kwésemba 19ánivo Píyésepuna asirayánkáꞋó taraváá-kwámbó kwémaitiyuwaundarakai kentí kwaásigwaraꞋa Píyésepuna asirayánkáꞋá taraváá-kwámbá maitiyúwáásino. mirán-áímbó síyasamo ésa kentí kwaási kampaꞋá kwésewe sénááowe. 20ánivo kemá Áánútuna asirayánkáꞋá taraváá-kwámbá kwémaitiyuwaundayavena Áánútuna asirayámbá keinárawapimba kwévaarisaꞋa kwéawanaaowe. 21asirayán-kwáásígó iwevóí tokéna kwená naakaꞋá kárákwiraisana kwená náaindaamba kaweꞋá umái kwáyáivo 22moóráwai kwená asirayámbá usáyaaitaraiwai téna tainkámbai kwená iwevóí asiramái tátokain-iwevoi tayaviyéna kwená náaindaamba tayavírena taaín-timakaiye. 23kembá íma kwésuwaꞋnaa-esa kesí namuro-kwáásíráámbá umái kwémaewe. íma súwaꞋnaa esa kwaási torupamái símémba kóyáwé kwéumagowe Ísu siráiye.

taraváá-kwánkó koyauwékain-kwasai.

Mátíyu 12:43-45

24Ísu simásuwena moórá-aimba séna kwaási arumpinkémbá taraváá-kwánkó auwéna kavóná-maravaꞋa nombá íma kwáyáipaꞋa kogwénaaena séna náávara ménaumno séna avakáá uwááena séna tayauweréꞋa kesí naambá kwaási arumpimbá póꞋa koménaumne simásuwena 25téna taawánaimba mindánkómbá kankambá kwiyúꞋmái kawer-umásukaisana taawánéna 26tayauweréna avakaeté-taravaa-kwamba miwítí sáwí-mayai anómba uráawai kotíꞋmaena minkwáásígó arumpimbá tamáyáawana moórá-taravaa-kwamba arumpimbá máyáísana minkwáásígó sáwíꞋa umái máyáísasa naaémba sáwíva-taravaa-kwamba máyáawana kwemá anómba sáwíꞋa umái méraiye Ísu siráiye.

áraiꞋa tirunkó kaweꞋá kwéin-kwasai.

27Ísu mináímbá simásuwowana sáwíva-kwaasivinkemba moórá-ininko Ísuntavena anónkaꞋa séna enanó embá maránkarena náámba ámakaiwaimba Áánútu kaweꞋá umánkaraiye súwana 28Ísu séna áraiꞋa sémpo Áánútu kwenáái ísámai kaweꞋá kwéowaima anón-kaweꞋa kwéumatinkaiye Ísu siráiye.

ímo awánáúnda-mayai mayaaó siráan-kwasai.

Mátíyu 12:38-42, Mááka 8:12

29súwasa sáwíva-kwaasi ÍsunopaꞋa tóyo uwaná simátimena séna ívéꞋo máyáan-kwaasi sáwí-kwaasiman-owe kentávéꞋa kwésemba Áánútumo aiꞋmákainamo e ímo awánáúnda-mayai máyénata awánaanomo kwésemba naaóváꞋá Áánútu Yónaamba uráintemba kembá mirá ínívo mináímbá imáyáa oró. 30naaóváꞋá Nínívaa-naopaken-kwaasi Yónaa uráintavesa Áánútu aiꞋmákaiye siráantemba kemó ondá awánéꞋa Áánútu aiꞋmákaiye sénááowe. 31naaóváꞋá Yútaa-kwaasiraꞋa kárákwirowai áwíꞋa Sórómoni kawer-ímáyáávínkémbá aaimá kwésimatimuwana moórá-ininko némpaken-kawaa-ininko Sórómonin-aai koisánáe séna kweémena kuráiye. ívéꞋa kemá Sórómonimba usáyaaitaraundawai máyaunaꞋa kesáái íma kwéisaamba póna naaémba Áánútu kwaásimo máyáawaina ááintavena tísaa ínín-kanaa tínímba minínínkó keinárawaꞋa aaivimbá maitinkéna séna kemá némpakemba Sórómonin-aai taísaraumpo Sórómonimba usáyaaitaraiwai kentópaꞋa máyowaꞋa kwenááimo ísááraamba íma ísaraawe síníye. 32naaóváꞋá Yónaa Nínívaa-naopaꞋa Áánútun-aai kosimátimuwasa isésa sáwí-imayaa tuwésa Áánútun-aai ísaraawe. ívéꞋa Yónaamba usáyaaitaraundawai máyaunaꞋa kesáái íma kwéisaamba póna naaémba Áánútu kwaásimo máyáawaina ááintavesa tísaa ínín-kanaa tínímba Nínívaa-naopaken-kwaasi keinárawaꞋa aaivimbá maitinkésa sésa Yónaa-aai iséta sáwí-mayai tukáundayaanivo Yónaamba usáyaaitaraiwai kentí naaópaꞋa máyowaꞋa kwenáái iséꞋo sáwí-mayaimo túwááraamba íma tukáawe Nínívaa-naopaken-kwaasi sénááowe Ísu siráiye.

túranko kentí imáyáavimbo sámo kwégain-kwasai.

Mátíyu 5:15, Mátíyu 6:22-23

33oómbó kúraꞋmaraamba íma aúpáꞋá maráíyamba avoraꞋá mayáíyasa naaúmpaꞋo iyíyawai awánanaaowe. 34miráumai túranko kentí imáyáavimbo sáma kaí-yántááꞋán-iye. túrankomo kaweꞋó umáímo awánáínanamo éna amápar-imayaa sáma káníye. túrankomo ímo kaweꞋó umáímo awánáínanamo éna amápar-imayaa túnkwiniye. 35kentí sáma kaí-yántááꞋá túnkwiyavainivo kentúraꞋa kárákwimai kaweꞋá oró. 36kentí imáyáago íma túnkwimba amápaꞋa sáma kwégaimba oómbá sáma kamátinkaintemba póna kentí imáyáago kentúraꞋa sáma kamátinkaniye Ísu siráiye.

mono-káwáá-kwáásí sáwíꞋa owé siráin-kwasai.

Mátíyu 23:1-36, Mááka 12:38-40, Árúku 20:45-47

37Ísu mináímbá simásuwowana moóráwai ámáán-kawaa-kwaasigo ÍsunopaꞋa téna séna kesí naaúmpaꞋa toómbá umandaaó súwana toómbá naaíndayavena uména 38íma ayáámba sese umásuwena toómbá kwénowana minkwáásígó awánéna áátavai éna imáyáa úwana 39Ísóigo awánéna simámena séna kemá ámáán-kawaa-kwaasi anavéúne táávere paákáré suꞋmai kwésese ovo andáámpaꞋa sáwíꞋa uráisaꞋa túran-anda kwéeꞋa sáwíꞋa kwéowe. 40sáwí-imayaagwara-kwaasi máyáawe. Áánútu paáká-tántááꞋá éna andáámpa-tantaare imáyáawe mindágwaraꞋa uráiye. 41kentí imáyáamo arupí éꞋo kemó makén-tantaaꞋo ímo makén-kwaasi timéꞋo éꞋa kentí imáyáao kaweꞋá íníye.

42kemá ámáán-kawaa-kwaasi kentí kígauvakemba sáwíyan-tonkwaraꞋa taaínkaar-umai siyáánkai makéꞋa moórá Áánútumba kwéameꞋa kaweꞋá kwéeꞋa mirán-áímbá ísámai iyéꞋanivo anón-amaamba iváꞋá tuꞋmaréꞋa póꞋa Áánútumba íma imáyáa kwéameꞋa óísaniyaain-kwaasi sáwíꞋa kwéumatinkaantavai kárákwiyoro. 43kemá ámáán-kawaa-kwaasi monoꞋ-náúmpáꞋá uméꞋa kawer-áyámpáꞋá kwaási túrankaꞋo umáémba tiráái kwétaiye. marupáꞋó umáyáawasa kwaási tuwánésa kawer-áímbó sembá tiráái kwétaimba póꞋa kentúraꞋa kárákwiyoro. 44kwaásimo maipímbó utámakaawanamo kaviraisasamó kwaási ímo awánaantemba kentirumpimbá mirá isaꞋá sáwíꞋa kwéowasa kwaási íma kwétuwanaamba póꞋa kárákwiyoro Ísu siráiye.

45Ísu simásuwowana moóráwai ámáámba sún-kwaasigo Ísuntavena séna mirámó sénda kentáágwáráꞋá simáíya sáwíta kwéumasinkaane súwana 46Ísu séna kemá ámáámba sen-kwáásí kemó ámáámbo simátímén-ainko umbaí kwétiyaisaꞋa mináímbá íma kwétuwaꞋnaa-omba póꞋa kárákwiyoro. 47kentíkwáꞋná Áánútun-aai simátímakaawai tínkamuwasa púwúwaꞋa utamátínkaraapaꞋa konaarirí kwéowe. naaóváꞋá kentíkwáꞋná uráantaveꞋa kaweꞋá uráawe séꞋa utamátínkaraapaꞋa konaarirí kwéomba póꞋa kárákwiyoro. 49naaóváꞋá Áánútu kawer-ímáyáávínkémbá séna kesáái simátimenaaowaiye agaráátinkanaaowaiye tiꞋmáráanasa miwívímbá kwénaaiyasa évakarawai sáwíꞋa umátinkesa évakarawai tínkamiyasa puwónááowe Áánútumo siráimba mináímbá paáruraiye. 50naaóvákwárá avumpinkwárá naaénkwaraꞋa Áánútun-aai simátímakowaima tínkamuwasa pukáantavai póna misáwíꞋó uráawaina anondá-meyamba ívéꞋo máyáan-kwaasitopaꞋa tíníye. 51aivaꞋó tuvúwanamo pukáin-kwaasigo áwíꞋa Épeo naaémba moóráwai áwíꞋa Sékáraya anóm-bonoꞋ-naumpaꞋa máyowana moórá-ayampaꞋa Áánútuntavesamo ísámaimo póímo tuvúꞋmáímo agáyáan-ontan-tarei kwáyowana moórá-ayampaꞋa aivaꞋ-mónó-káwáánákówé suꞋmai iyún-ontama kwáyowana avumpimbá Sékáraya umáyowasa túvúwana pukáiye. minkáé-kwáásíráí avumpimbá tínkamuwasa pukáawaigwaraꞋa miwítí sáwí-meyamba ívéꞋo máyáan-kwaasi mayánááowe. 52kemó ámáámbo sen-kwáásí árair-aimbo ímo aúpáꞋó tukáankakai mináímbá ísámai kawer-osinó. kemá íma ísámai kawer-ombá óꞋon-kwaasiti aambá aúnkaamba póꞋa kárákwiyoro Ísu siráiye.

53Ísu mináímbá simásuwena máápaꞋa kumúwasa ámáámba sun-kwáásíyé ámáán-kawaa-kwaasiye tirumpimbá áwááꞋa aéésa óꞋon-oꞋon-tantaatavesa áísaa umai ísáananamo 54aaimó kaéꞋmái-aimbo sínaꞋo éꞋa aaivimbá mayankánáe sésa áísaa uráawe.